|
Ansprache des Gründungs- und Ehrenzunftmeisters Anton Steiner am Gründungsball im Hotel International am 2.10.1976
Hochlöblicher Herr Konstaffelherr
Hochgeachteter Herr Präsident vom Zentralkomitee vo de Zürcher Zöift
Hochgeachteter Herr Zunftmeister vo de Göttizunft St. Niklaus
Hochgeachteti Herre ZM
Hochgeachteti Herre Vorsteher & Zöifter
Sehr verehrte Herre Kantonsröt
Sehr verehrte Herr Gmeindsrotspräsident
Sehr verehrti Herre Gmeindröt
Sehr verehrti Frau Stadtrot
Sehr verehrte Herr Stadtrot
Sehr verehrti Dame & Herre vo de Press
Mini sehr verehrte Zöifters-Fraue, Dame & Herre
Den Tag, den die Götter einmal nur im Leben gewähren können, feire jeder hoch: Das hät scho de Göthe gseit:
Es isch mir als Zoiftmeister vo de Sch'dinger e grossi Ehr, Eu alli
zäme zu eusem Gründigsfest, do im International herzli willkomme
z'heisse. Vor anderhalb Johre, 2 Tag vorem Sechsilüte 1975 hemer dörfe,
mit Euem Rot usgrüstet, Eusi Zoift im Hirsche Schwamedinge, im Bisy vo
de Vorsteherschaft vo eusere Göttizoift St. Niklaus zur Taufi use hebe.
Aber scho sit bald 10 Johr hemer immer wieder vonere Zoift im neue
Kreis 12 gredt. Gar mengmol hemer e Notiz im Mitteiligsblatt vo eusem
G'werbverein Sch'dingen über die neu Zoift erschiene loh. Was aber denn
bald niemer me so recht glaubt het, nur mir und Göttizoift hends immer
unerschüttli ghofft, isch denn i dere denkwürdige Sitzig vo de
Delegierte vom Zentralkomite vo de Zürcher Zoift am 26. November 1975
wohr worde.
Mir hend bereits dörfe am letschte Sechslilüte i de Mitti vom Zug mit
marschiere. Mir danket, dass mir Chline Schwamendinger Ebebürtig ufgno
worde sind, und so eus die gross Ehr z'teil worde isch, Eu alli hüt
Obig zu eusem Fest herzli willkomme heisse z'dörfe. Es isch eus e
grosses Vergnüege, e sones höchs Publikum als Gast dörfe z'verwöhne.
Das söll de Dank si, für alles das, was Zöift für d'Schwamedinger tue
händ.
Vili vo Eu weret si wol scho g'fragt ha, wiso au e neui Zoift z'Schwamedinge? Do usse wohnt doch nimer rechter:
Au mir z'Schwamedinge hend scho lang e lebendigs Gwerb, Verein &
Parteie. Eusi sorte Lüt isch scho bald 20 Johr im Gwerbverein aktiv.
Mir möchted das doch gern bewise, dass en gsunde Kern im neu g'wachne
Quartier vorhande isch. Im Johr 1945 het Schwamendinge 3000 Iwohner
zählt, hüt sinds 10x meh. Berümt simer in de letschte Johre wegem
Strossebau worde. Doch au das wömer mit Würdi träge.
Vor meh als 1000 Johr het die Pieho vo Suamundinga em Grossmüester sin
ganze B'sitz g'schenkt.Au die Nachfahre vom Grossmöester, Zöift vo de
Stadt Züri hend denn Johrhundertilang de Zehnte vo de Schwamendingere
ikassiert. Nochere bestimmte Lebesuffassig isch es doch so: Alles tuet
sich uf dere Welt uszahle, sigs guet oder bös. Für die damalig Schenkig
und für die Johrhundertilange Zinszahlige händ mir nun dörfe de Wechsel
präsentiere und am 26. November vom letschte Johr au iläse.
Mir fühlet eus sit do als vollwertigs Glied i dere prächtige Ketti vo
de Zürcher Zöift. E chlini Bitt wöti aber doch no im Name vo de
Schwamendinger a Sie, Hochwohlgebortne Dame & Herre voträge. Euses
Quartier und demit au Eusi Zöift het im Grund gno anderi Vorussetzige,
als di andere Quartier angestammte Zöift. Nochdem mir doch vo Eu di
offiziell Ufgob übernoh hend, bi eus usse s'Bürgertum z'pflege und de
Rechtsstaat hoch z'halte, wämer scho chöne, uf üsi Art euses Eigelebe
gestalte. Mer möchted im Volk verankert si. Heisst doch euse Spruch:
Vor alle Dinge-Schwamedinge
Was mir erstrebet, got klar us eusem Wohrspruch hervor:
Die Heimat zu ehren, dem Nächsten zu dienen
Die Freundschaft zu pflegen und an die Zukunft zu glauben.
I dem Sinn wöusch ich Ihne en vergnüegte Obig und hoffe, dass Ihr no lang as Gründigsfest vo eusere Zöift zrugg denke werdet.
|
Unsere Zunft 